الشاعر حامدي : خلاص ارحل ياللي سموك ،، بملك ملوك

قصيدة للشاعر حامدي في المهجر ،، أراد أن يشارك بها اخوانه الثوار:

خلاص ارحل ياللي سموك .. بملك ملوك .. الليبين معاد يبوك .. ارحل ياسر
خلاص ارحل ماليك مكان .. بعد هانوك الليبين
انتفضوا في وسط الميدان .. كفانا قالوا ظلم سنين
طلعتلهم كيف الشيطان .. اتهدد باسلوبك وتهين
بقولت من انتم جرذان .. وهم قوة وايمان ودين
  بقولت من انتم جرذان .. بنزحف وامعاي ملايين
لاونه محتال جبان .. جلب مرتزقة مأجورين
قصفهم ماخلا بنيان .. بجملة تدمير حياشين
من بنغازي صار بيان .. شرارة وتموها لخرين
ومن البيضاء لعند الزنتان .. اسمعنا صوت الثوريين
رفعوا راية ثلاث ألوان .. بنجمة مع لهلال قرين
راية الاستقلال زمان .. قديمة من عام الخمسين
ومصراتة جلت لحزان .. بعد كر وفر وتفنين
  قالو ياسرنا حرمان .. وقتل وتشريد نساوين
اللي قلت عليهم جرذان .. وهم قوة ايمان ودين
صقورة لاونهم فرسان .. انكان دار البارود زنين
هاديم اللي جلّوا الطليان .. هديم اللي تعرفهم زين
ايهدو مايهابو النيران .. ايردو في الصاع بصاعين
عرب ليهم عادة شجعان .. من الماضي موش جديدين
أجواد وعيلهم عصران .. أنصار امناده فزاعين
ما نحصيهم في العدان .. اللي في الجبهة موجودين
ومش خافي باقي لخوان .. ولا للسامع مجهولين
  جبل انفوسة ماينهان .. بعون المولى منصورين
اللي تحلف وسطه بركان .. رجالة جسار فراسين
الحوامد هزاتك هزان .. علي جيشك جو منهدين
كتائب دكوها دكان .. جنودك رجعوا مهزومين